Víctor Terán / Xhí Ca Diidxa’ Huala’dxi’

(Día Internacional de la Lengua Materna)

OAXACA, Oax. 21 de febrero de 2014 (Quadratín).- Rugapadiu’xe’ laatu binnixquídxeca’, binnizá ca’, binniyooca’. Yanadxí gula’qui’ ca binni runi dxiiña’ ra UNESCO (Organización de las Naciones Unidas para la Educación, la Ciencia y la Cultura), ti chu ná’ ONU (Organización de las Naciones Unidas), gusisácanu ca diidxa’ riní’ guiráxixe binni ndaani’ guidxilayú, ca diidxa’ huala’dxi’, ¿guná’ nga diidxa’ huala’dxi’ stinu? Diidxazá, diidxa’ riní’ ca binnizá.

Lu iza chupa bixhiapa, gula’qui’ UNESCO dxi di’  (día internacional de la lengua materna), ti guietenala’dxinu ne gulábinu, cadi guiniti diidxazá stinu, cadi guiniti ca diidxa’ riní’ binni ndaani’ guidxilayú di’. Huaxa ziluá’ sia’, dxi si di’ rietenala’dxi’ ca binni xpinni gobiernu, casi INALI (Instituto Nacional de lasLenguas Indígenas), casi CEDELIO (Centro de Estudios y Desarrollo de las Lenguas Indígenas de Oaxaca), gúnica’ ti yaya huiini’, ne nguesi nga laani, rusiaanda caca’ ne qui ruyúbica’ gúnica’ ti dxiiña’ nadipa, ti cadi guiniti ca diidxa’ huala’dxi’ rininu ndaani’ guidubi Lulá’ ne Méxicu.

Pa laacabe qui runi cabe gasti’, ricaasicabe ne riguítecabe xpidxichi guidxi, laanu cadi gusaananu guininu laacabe, guca’nu ridxi laacabe, tila zacá guituí lúcabe ne guyubi cabe gacanécabe ca ni rusiidi ca diidxa’ huala’dxi’, ca ni rucaa diixa’ huala’dxi’, cani rusisaca xtiidxanu dxi ne dxi.

Cadi huaxa icá lunu laacabe, cadi huaxa cuinu cuézanu pa gúnicabe, pa cadi gúnicabe dxiiña’, laanu laaca zanda gúninu xiixa ti cadi guiniti diidxazá stinu. Xi zanda gúninu laanu la?  dxiiña’ ni jmá risácape’ ne riquiiñepe’ xa, guca’nu ca xiiñinu guiní’ diidxazá, gusi’dinu laaca guiní’ca’ stiidxa’ ca bixhoze gólanu. Ndí’ nga dxiiña’ ni jmá caquiiñe’, ti pa laanu qui gúninu dxiiñadi’ la? huídxeca ma ziné gabiá diidxazá stinu, huídxeca laanu ma bínitinu neza, ma bidxé lunu, ma canalanu yaga cherí’ cherica’, ma gasti’ nácanu, ma casi guixhi ziné bi neza guialela’dxi’.

Diidxazá stinu risaca, cadi gudxii déchenu laa, laani nga rini rudii guendabiaani’ laanu ti ganda guiénenu guidxilayú, ti ganda guibáninu ndaani’ guidxilayú. Cadi diidxaxtiá di’ gulenenu, diidxaxtiá rininu laa ti ca dxu’ bidxiga’ cani laanu, bicaaca’ laanu gusia’ndanu ca xpido’no, bixhiá ca’ ca yoo ndxo’ bicuí ca bixhoze gólanu, bizaaquica’ ca gui’chi’ ne ca guidi ra bicaa ca binnizá gola xquendabiaani’, gúxhaca’ ne zineca’ guirá’ ni risaca, casi bidxichi guchi, sti’ ca xquídxinu, ne bisaanaca’ laanu xieenanu. Yanna ne televisión, ne radiu ne escuela stica’, nuuca’ gusia’ndanu diidxazá, ti nannaca’, pa gusia’ndanu diidxazá, zusia’ndanu tu laanu ne zácanu binni riga, zunítinu tu laanu, ne tu runiti tu laa, runiti neza, ridxé lú,  qui zanna paraa pe’ nga ché’ ti ganda guibani sicarú, ti ganda guibani lu guendanazaaca’, lu guendanacha’hui’.

Laguuya’ binniyoo ca’, laguuya’ binnizá ca’, cadi guixhí’ natu guiruti’ ñábini laatu; naa la? cayune bia’ stipa huiini’ stinne’, ma bicaa chii xquiapadiidxa’, gadxe ma runibia’tu laa, xhonna ca ca’ru’ ti ca’ru’ guireecani lu gui’chi’, huidxe, Brooklyn, NY, EEUU, zaree sti xquiapadiidxa’ cubi stinne’, biaa paraa cusisaca cabe diidxazá stinu, ne rarí’, Lulá’, Méxicu, guiruti’ zaree, na’, gacané ca binni rucaa diidxa’ huala’dxi’, casi ca ni rucaa diidxazá.

Neza nga gula’qui’ cabe dxi di’ guietenala’dxi’ guidxilayú ca diidxa’ riní’. Laanu rininu diidxazá, cadi guiaanda’ laanu gulábinu laa, guicaanu gusiniisinu laa casi riniisi ti baduhuiini, gu’yanu’ guibani nadipa’ ti ganda gucheeche’ xinaxi sti’ ca guenda stinu. Ne casi guninu dxi nácanu xcuidi, ra ma caguítenu: xquie bi’cu’ tu qui guiní’ diidxazá.

Víctor Terán

Beeu biropa, iza 2014.